Xweza: Daxwaza Neteweyî

torsdag den 26. maj 2016

Daxwaza Neteweyî

Daxwaza ji PDK û PKKê

Bo Kurd û Kurdistanîyan

Bo bîr û rehîya giştî

Di vî demê gelek hessas yê Kurdistanê da, yêk ji mezintirîn pirsa navxweyî nebûna tifaqa mezin ya dînamîkên neteweyî û niştimanî yên Kurdistanê ye. Bi vê munasebetê me 50 [pêncî] ronakbîr û siyasetmedarên Kurdistanê bi navê "Daxwaza Neteweyî" bangek amade kir û belav dikin. Di bangê da hem destnîşanîya vê pirsê tête kirin hem jî bi taybetî daxwaz ji du partîyên xwudan hêz yên Kurdistanê, PKK û PDKê tête kirin ku tifaqê bikin.

Bang ji bo piştgirîyê vekirîye û herkes dikare vê piştevanîya xwe bi rengekê diyar bike.

***

Daxwaza Neteweyî

Ev hevoka sihrî, "Sedsala 21an dê bibe sedsala Kurd û Kurdistanê", ku xewn û xiyala hemû Kurd û Kurdistanîyan îfade dike, hema bêjin ji teref hemû pêşeng û rêberên polîtîk, sosyal, kulturî û sivîl û timamî neteweyê Kurd ve tête gotin.

Bi vê xwezî û daxwazê Kurd îro bûyne xwudan imkan û destkevt jî.

Li nav Iraqa Federal jî be Kurd li başûra Kurdistanê xwudan statû ne.

Li Sûrîyeyê îro serûbinbûneke dijwar tête jîyan. Di vî delîveyî da Kurdan li rojavaya Kurdistanê bi timamî bi hêz û şiyana xwe erdê xwe hilgirtine bin kontrolê û îdareyeke xweser ava kirine. Ev statûya meşrû di meydana navneteweyî da gav bi gav qebûlîyê dibîne.

Li bakura Kurdistanê têkoşîna azadîyê digel hemû zor û zehmetîyan didome. Herweha li rojhilata Kurdistanê jî neteweyê me di nav berxwedana azadîyê da ye.

Lê belê; li goreyî imkan, destkevt, têkoşîn û berxwedana îro û bedelên hatine dayîn, herweha pozîtîvîya konjonktûra navneteweyî, doza Kurd û Kurdistanê hêj jî rû bi rûyî êriş, tengavî, gir û giriftarî û dek û dolabên dagîrkeran e.

Di vê rewşa îro da lawazîya herî ber bi çav ya Kurdan nebûna tifaqa mezin ya navxweyî ye û eve gelek micid cihê nigeranîyê ye.

Di saheya polîtîk ya Kurdistanê da gelek partî, organîzasyon, kom û komeleyên polîtîk, sosyal û kulturî hene. Belêm di vê meydana polîtîk da du partîyên Kurdistanê hene ku li ser qedera Kurd û Kurdistanê roleke bi tesîr dileyizin.

Ev herdu partî; Partîya Demokrat ya Kurdistanê-PDK û Partîya Karkerên Kurdistanê-PKK ne.

Rol û giranahîya van herdu partîyan hemû Kurd dizanin, dibînin û têdigihin.

Mixabin ku di navbeyna van herdu partîyan da diyalog, têkilî û danûstandineke kamil ya di dereceya bilind ya pêdivî da nîne û nayê dîtin. Eve di her warî da, li nav û derveyî welat pirsgirêkên mezin derdêxe pêşîya doza Kurd û Kurdistanê.

Lewma; em daxwazê dikin ku ev herdu partî li ser bingehê berjewendîyên neteweyî û niştimanî tifaqeke xurt pêkbînin û ji bo ava kirina yêkîtîya mezin û fireh ya neteweyî û niştimanî pêşengîyê bikin û gavên ber bi çav biavêjin.

Di vê prosesa man û nemanê û sed salîya Peymana Sykes-Picot da, ku êdî hukmê wê zihnîyetê nemaye; Kurd û Kurdistanî divêt daxwazeke xurt ji van herdu partîyan bikin heta ku encameke di xêra Kurd û Kurdistanê da derdikeve meydanê.

Îro di nav êrişkarîyên piralî û xeternak yên dagîrkeran da; PKK û PDK guh bidine vê xwezî û daxwaza neteweyî û niştimanî û gavên pêdivî biavêjin dê dilê neteweyê Kurd fireh û germ û gur bikin.

Herkes bila biaxive belêm roj êdî roja kiryarê ye. Bi vê bîr û hizira demokratîk em li hevîya encameke xêrdar in ji alîyê van herdu partîyên Kurdistanê ve.

16 Gulan 2016

Bangdêr: