Di vî demê rûdana Sedamîzmên nû [Neo-Sedamizm] da divêt JENOSÎD-ENFAL neyên ji bîr kirin ku jenosîd û enfalên nû rûneden.
Rojên bombardumana jahra kîmyayî ya li ser Helebçeyê, 16-17 Adar 1988, qet û qet ji bîr naçin...
Rêz û silav bo şehîdên Helebçeyê û hemû şehîdên doza Kurd û Kurdistanê.
RH
Digel Salih Muslum li Ofîsa PYDê li Silêmanîyê.
Yê li milê min yê çepê jî Nasir Herkî ye. Nîsan 2014, Silêmanî
Mixabin, Salih Muslum [11 Adar 2026] li Hewlêrê koça dawîyê kir.
Salih Muslum, têkoşerekî bijare yê doza Kurd û Kurdistanê bû.
Di xebat û têkoşîna rojavaya Kurdistanê da roleke giring û pêşeng bi cih îna.
Di demê Hevserokatîya wî ya PYDê da li meydana Ewrûpayê xebatên me bi hev ra çêbûn di nav KNKê da.
Nîsana 2014ê me seredanîya wî li Ofîsa PYDê ya li Silêmanîyê kiribû.
Paşê jî gelek cara me hevdu dît.
Ew jî wekî hemû têkoşerên doza Kurd û Kurdistanê çû esmanê Kurdistanê û di rêza stêrkên dibiriqin da cihê xwe girt.
Bila bibe bereketa Kurd û Kurdistanê.
Serê binemala wî, partîya wî û xelkê Kurdistanê sax be.
ROJAN HAZIM
Not:
Meytê wî birine rojavaya Kurdistanê û dê li şehrê wî Kobanîyê bispêrine axa ku giyanê xwe bo feda kirî.
**
Anekdoteke girnijînker li ser min û Salih Muslum
Sal 1978, payîz, ez bi erk û berpirsiyarîyeke rêxistinî [PSKT-Rêya Azadî] çûbûme rojavaya Kurdistanê, Qamişloyê û Sûrîyeyê, Şamê.
Hingê mêhvanê YNKê bûm.
Gelek berpirsiyarên YNKê hingê li Qamişlo û Şamê bûn.
Li Qamişlo mêhvanê Dr. Kemal Xoşnav bûm.
Li Şamê jî mêhvanê Dr. Fuat Masûm, Emer Debabe, Şêx Şemal Bax, Mela Nasuh bûm ku gelek kadroyên dî yên YNKê jî li wê derê bûn. Salar Azîz jî, hingê yêk ji berpirsiyarên YNKê bû ku ji xwe di rêvebirîya Komeleyê da bû, min hingê nas kir...
Êvarîyekê jî digel Emer Debabe, Şêx Şemal, Mela Nasuh bo şîvê li mala Elî Eskerî, ku hingê kurên wî Şoreş û Şalaw biçûk bûn, bûne mêhvan...
Şêx Şemal xelkê Silêmanîyê bû û kadroyekî pêşeng yê Komeleyê bû ku rêxistina herî mezin ya YNKê bû. Ez û Şêx Şemal li hotêleke merkeza Şamê diman. Me bi hev ra resim kêşabûn...
Piştî salan, Nîsana [April] 2023yê dostekî min yê ji YNKê bi mesajekê resmek bo min rêkir ku ji arşîva YNKê, Kanûna Pêşîn [December] ya 2022yê hatibû belavkirin. Di resim da ez û Şêx Şemal Bax bûn... Resmekî dî yê min û Şêx Şemal di arşîva min da hebû, lê belê ev resmê ji Arşîva Şoreşê belavbûyî bo min jî dîyarîyeke zêrîn bû çiku di arşîva min da nebû... Bes di danasîna resim da dihate gotin ku Şêx Şemal digel Hevserokê PYDê Salih Muslum, sala 1980.
Êdî wext e ku heqîqeta wî resmî aşkera bikem... Ew kesê ku digel Şêx Şemal (*) ez im û ew resim me bi hev ra li payîza 1978ê li Şamê kêşabû... Arşîva Şoreşê ya YNKê ez di vî resmî da kirime Salih Muslum...[Resim li jêr e.] (**)
Dinya ye, piştî salan min û Salih Muslum li Ewrûpayê hevdu nas kir û di nav KNKê da bi hev ra xebat jî kir.
Bi vê munasebeta koça wî ya dawîyê min xwast vê rasthatina min û wî ya balkêş ya di resim da bi girnijînî bikeme notek di arşîva dîrokê da...
Her mirin zû ye belêm ya Salih Muslum gelek zû bû û ew dê herdaîm li bîr be.
RH
(**) Not:
Ew resmê min behskirî li jêr e:
Li ser resim bi zaravayê Soranî û alfabeya Aramî-Erebî wisa hatîye nivîsîn:
Rojavayî Kurdistan - salî
1980
Layî rast: Berêz Salih Muslum – Hawserokî PYD
Layî çep: Şehîd Şemalî Bax
(Veguhêzîya ji alfabeya kevin bo Latînî: Baban Seqizî)
Bes rastîya resim wisa ye:
Payîza 1978ê, Şam - Sûrîye
Li çepê: Şehîd ŞÊX ŞEMAL BAX
Li rastê: ROJAN HAZIM
[anku ez]
(*) Not:
Şêx Şemal Bax, gelek mixabin li 15ê Nîsana 1983yê di şerekî wêranker yê di navbeyna dînamîkên navxweyî da hate şehîdkirin.
Bi vê munasebetê wî jî bi dilgermî bi bîr tînim.