Xweza: februar 2025

fredag den 21. februar 2025

21ê Sibatê, Roja Makzimanan ya Dinyayê Pîroz Be

Gelî Kurda,

Qedir û qîmetê makzimanê xwe bizanin.

Bi makzimanê xwe biaxivin.

Makzimanê we Kurdî ye.

Hûn Kurd in û nîşana hebûna we makzimanê we Kurdî ye.

Bi Kurdîya xwe serbilind bin.

Bi Kurdîya xwe bijîn.

lørdag den 15. februar 2025

Bapîrî tixûbê 70 bezand... - ROJAN HAZIM

Ev qevda gul û kulîlkan, Alaya Kurdistanê û findika bi rengên Alaya Kurdistanê hatîye nexşandin, dîyarîya nevîyên nazdar û hemû ehlê Mala Mezin in...

Roj 15...

Heyv Sibat...

Sal 2025...

Bapîrî vê rojê û vê heyvê û vê salê tixûbê koça dawîyê bezand...

Boçi tixûbê koça dawîyê..?

Çiku tixûb wisa hatibû danan...

Çiku tixûbê koça dawîyê wisa hatibû kêşan...

Çiku tixûbê jîyî wisa hatibû gotin...

Başe kê ev tixûbe danabû..?

Boçi ev tixûbe kêşabû ji bo jîyanê..?

Boçi ev tixûbe vebirîbû bo jîyê li vê dinyayê..?

Salên 1933-46an da şairekî ciwan û jîr, Cahit Sitki Tarancî, ji Diyarbekirê qelemê xwe gelek zîrekane bi kar tîne û gelek şeiran dinivîse.

Yêk ji şeirên wî jî bi navê "Jî 35" e...

Vê şeirê di jîyê xwe yê 35an da dinivîse.

Jîyê xwe yê 35ê wekî nîveka jîyî [temenî - emrî] qebûl dike.

Beyta ewil ya wê şeira wî wisa ye:

" Jî 35, dibe nîvîya rêyê.

Em di nîveka jîyî da ne şubî Danteyî. "

Li vê derê mexseda wî ji Dante, şair û nivîskarê navdar yê Îtalî Dante ye...

Anku "Dante Alighieri (1265-1321)...

Nivîskarê "Komedya Îlahî" [LA DIVINA COMMEDIA] Dante...

Temsîlkarê Ronesans û Humanîzmê Dante...

Dante di vê şahesera xwe da behsê nîvîya jîyî dike...

Nel mezzo del cammin di nostra vita

mi ritrovai per una selva oscura

ché la diritta via era smarrita. (*)

Di nîveka jîyana me da

Min xwe di nav daristaneke tarî da dît

Çiku rêya rast berze bû

Cahit Sitki Tarancî jî ji vê teswîra Dante ya "Komedya Îlahî" îlham wergirtîye û nîvîya jîyî wekî 35 nivîsîyê... Ji lêkolînan tête têgihiştin ku referansa Dante jî di meseleya nîvîya jîyî wekî 35 û jîyê li dinyayê wekî 70 sal da, Zebûra Dawût Pêxember [Peyambir] bûye...

Dante jî di 56 salîya xwe da koç kirîye...

Li goreyî van gotina, Peyambir Dawûd di Mezmûrên xwe da [90-8] behs kirîye ku rojên jîyanê dê hilkevine 70 salan û lavayî Xwudêyê xwe kirîye ku wî di nîveka vî demê behs kirî da nede koç kirin... Ew jî dibe 35 sal... Balkêş e, Peyambir Dawûd di 70 salîya xwe da koç kirîye...

Bi her hal li goreyî Zebûrê be, li goreyî Dante be anjî li goreyî Tarancî be, wan emrê li dinyayê 70 qebûl kirine û jîyê 35ê jî wekî nîveka rêya jîyanê bi nav kirine...

Peyambir Dawûd jî, Dante jî û Tarancî jî li goreyî demên lê jîyayî gelek comerd bûne ku tixûbê jîyanê wekî 70 sal hizirîne...

Demê Peyambir Dawûd li milekê, li demê Dante mumkun e ku jî heta 70 bûyî be...

Lê li cografyaya ku Tarancî lê jîyayî tixûbê jîyanê wekî 70 sal gelek istisna bûye ku wî bi xwe di 46 salîya xwe da ji ber nisaxîyê koça dawîyê kirîye...

Di wan salên Tarancî lê jîyayî û şeir nivîsî da tixûbê jîyana halxweşan dibe ku 70 be, lê bahra pitir xelk di 50 an 60 salîya xwe da koç dikirin ji vê dinyaya jîyanê...

Bes li heqîqeta îro, di vî demê em lê dijîn da tixûbê jîyî dirêj û bilind bûye û êdî jîyê 100, 110ê tête dîtin...

Nihe em van hersê jêderan ferzîmîsal wekî tixûbê jîyanê qebûl bikin ku emir li 70 salîyê bi dawî dibe û koça dawîyê pêktêt...

Hingê li ber van jêderan em dikarin bêjin ku Bapîrî bi gotineke metaforîk tixûb bezand anku tixûbê 70 salîyê bezand...

15ê Sibata 2025ê Bapîr bû 71 salî û ji wê derazînka xatirxastina ji vê dinyayê bi silametî borî...

Hêvî dikin tixûbê 100ê jî bibezîne û jî dirêj be...

Belkî jî 70 sal bibine nîvîya jîyê Bapîrî...

Ma boçi nebe..?

Ew talihê Bapîrî heye çiku babê wî 102, dayîka wî 110 sal jîyane...

Dûrî çavînkirinan ya bi xêr em bêjin...

Mal û eyalên Bapîrî, pêkve ehlê Mala Mezin, bi hezkirineke bilind ya ji nîveka dilî roja bûyîna Bapîrê xwe pîroz kirin û jîyaneke xweş û dirêj ya digel hemû hezkirîyan bo daxwaz kirin...

ROJAN HAZIM

15 Sibat 2025

Not I.:

Berê xwe bidene vê lînka li jêr ku teksta li ser 70 salîya Bapîr li ser e...

https://xwezabawer.blogspot.com/2024/02/hey-dinya-ji-ze-heta-baltike-70-sal-u_53.html

Not II.:

(*)