Prof. Dr. Nadir Nadirov jî îro [24 Tebax 2021], di 89 salîyê xwe da li Almataya Kazakistanê xatir xwast û koç kir...
Mixabin...
Nadir Nadirov wekî Kurdekî dîasporaya Sovyeta kevin û Kazakistanê bibû zanerekî nasyar û navdar...
Di warê Petrokîmyayê da bispor û zaner bû...
Ji ber vê jîrî û kêrhatîtîya xwe gelek madalya û sîyanetname û pîrozname wergirtibûn...
Li Kazakistanê nîşana "Mareşalê Zanistê" dabûnê û wisa bi nav dikirin.
Nadir Nadirov ji bilî kar û xebatên zanistî, herweha mirovekî Kurd û Kurdistan perwer bû.
Avabûna Kurdistanê, azadîya xelkê Kurd bo wî armancên pîroz bûn û mil dida bizava neteweyî û welatî...
Herdaîm xwazyarê tifaqa navxweyî bû.
Nadir Nadirov xwudanê xasyeteke nerm, mulayim, kubar û aram bû û mirovê diyalogê bû...
Me di nav kar û xebatên zimanê Kurdî û xebatên yêkîtîya neteweyî da hevdu nas kir. Hem li Parîsê di aktîvîteyên Instituta Kurdî ya Parisê da û hem li Brukselê di kom û kombûnên KNKê da suhbeta me çêbû...
1990ê min pirtûka "Zimanê Çiya" ya Harold Pinter [Tercumeya Mehmed Uzun] weşandibû û numûneyek jî dîyarîyî wî kiribû.
Wî jî ji kubarîya xwe nameyeke spasîyê rêkiribû li 8.08.1991ê...
Nameya wî meha tebaxa 1991ê hatibû û mixabin li tebaxa 2021ê jî koç kir... Ji ser nameya wî sih (30) sal borîne...
Nadir Nadirov dilsotîyekî ji dil yê doza Kurd û Kurdistanê bû.
Ew bi Kurdbûna xwe î serbilind bû û Kurd jî bi wî, bi navê wî, bi kar û xebata wî, bi zanerîya wî serbilind in û wî ji bîr nakin...
Ew jî wekî hemû xemxwarên doza Kurdistanê li esmanê Kurdistanê stêrkeke geş e bo heta hetayê...
Bila serê binemala wî û xelkê Kurd û Kurdistanê sax be...
ROJAN HAZIM
24. 08. 2021
