21ê Sibatê Roja Makzimanan ya Dinyayê - ROJAN HAZIM

Di vê roja navneteweyî da makzimanê Kurda anku Kurdî li bakur, li Tirkîyeyê di çi halî da ye gelo?

Mixabin di rewşeke perîşan da ye. Reftara dewleta Tirk tête zanîn. Hindî hûn bêjin zalim e beramberî Kurdî. Hêj jî li dûv siyaseta xwe ya qedîm e anku li ser asîmîlasyonê bi israr e.

Netîceyê werdigire ji vê siyaseta xwe lewma jî didomîne. Çiku dibîne Kurd jî li makzimanê xwe xwudan dernakevin. Rêzê li makzimanê xwe nagirin. Beramberî makzimanê xwe xemsar in. Di serî da zimanê fermî yê siyaseta rêvebir ya Kurdistanê jî Tirkî ye. Ma êdî halê Kurdî dê çawan be!

Dewleta Tirk asîmîlasyonê dike, Kurd jî otoasîmîlasyonê dikin. Encam yêk e; helyana Kurdî.

Dîsa ve mixabin bêjim, encam û rewş ev e.

Kurd jî bi vê bêpersiyarî, xemsarî û otoasîmîlasyona li ser makzimanê xwe avê dikêşine ser aşê asîmîlasyona dewleta Tirk.

Zimanê ku perwerdeya giştî pê neyê kirin bivê nevê lawaz dibe û di nav kanalê asîmîlasyonê da bi ber pêlên xeniqandêr dikeve.

Dewleta Tirk qet xwe nêzîkî perwerdeya giştî ya bi Kurdî nake û Kurdî ji vê yêkê zerareke mezin dibîne.

Nufûsa Kurdan li bakura Kurdistanê û Tirkîyeyê 20 milyon e.

Lê belê, nufûsa Kurdîaxêv di bin deh milyonan da ye û hetta mirov dikare bêje ku li dora heft milyonan e.

Nufûsa Tirkîyeyê digel kolonîya Kurdistanê ya nû ev e:

80 814 525 [Heştê milyon û heşt hizar û çardeh û pênc sed û bîst û pênc]

Nufûsa Kurdistanê:

16.373.755 [Şazdeh milyon û sê sed û heftê û sê û heft sed û pênceh û pênc]

Nufûsa Kurdên li dîasporaya Tirkîyeyê:

4.025.000 [Çar milyon û bîst û pênc hizar]

Nufûsa Kurdan ya li Kurdistan û dîasporaya Tirkîyeyê:

20.398.755 [Bîst milyon û sê sed û nehwêt û heşt û heft sed û pênceh û pênc]

Em hejmarê gurovir dikin û nufûsa Kurda wekî 20 milyon dibêjin.

Ji Ardahanê heta Meraşê şehrên di xeta bakur da cih digirin hema bêjin piranî asîmîle bûne.

Ji şehrên başûra rojhilatê jî hejmareke zêde bi ber vê asîmîlasyonê ketine.

Dimîne şehrên rojhilatê û çendek li başûra rojhilatê.

Lewma kêm zêde nufûsa Kurdên Kurdîaxêv ketîye bin deh milyonan û hetta mirov bi gotina herî maqûl dikare bêje ku li dora heft milyonan e.

Eve encameke kadastrofal e.

Eve hezîmet e.

Eve perîşanî ye.

Eve rûreşîya Kurdan e, ya pêşengên sosyopolîtîk û sosyokultural ya Kurdan e.

Êdî çi bêjin?

Di her 21ê Sibatê da em behsê makzimanên dinyayê dikin û bi vê munasebetê li ser makzimanê xwe jî disekinin.

Lê rewş ev e.

Gelî Kurdan hûn ji vê encamê razî ne?

Gelî pêşengên Kurdan hûn razî ne?

Belê kes razî nîne.

Hingê xwe ji vê rûreşîyê xilas bikin.

Li makzimanê xwe xwudan derkevin.

Zimanê xwe yê fermî bikine makzimanê xwe.

Ji bo perwerdeya bi Kurdî çi lazim be bikin.

Û bi vê yêkê rûyê xwe spî bikin.

ROJAN HAZIM

21 Sibat 2018

Leyiza salan ya dewleta Tirk: Kurda bi Kurda bide kuştin! Gelî Kurda eman ha! Rê nedine vê bêbextîyê!

Kurda bi Kurda bidine kuştin. Eve leyiza qedîm ya dewleta zalim ya Tirk e. Hukûmeta AKPê ya koalisyonal ya Ergenekon, Erdogan û Bahçelî rêkirina çekdarên Kurd [Korucu]  ji bo Efrînê plan dike ku careke dî Kurda bi Kurda bide kuştin. Dewleta Tirk eve serê dehan salan e li bakur bi hizaran Kurd dijî qewmê xwe kirine çekdarên xwe û bi vî rengî xencerek li nîveka dilê Kurda daye.

Dewletê ji xwe ev çekdar ji bo planên xwe yên qirêj û dijî mirovî wezîfedar kirine. Li bakur ev çekdarên dijî qewmê xwe şirîkên zulma dewleta Tirk in. Rola wan daîm bêbextî bûye beramberî miletê xwe. Ji bo berjewendîyên xwe yên şexsî ev rola bêyûm û bêbextane hilgirtine ser xwe. Van çekdaran di têkoşîna azadîyê da li bakur mil bi milê ertêşa dijminî bûne û lûlîya sîleha xwe dirêjî xelkê xwe kirine.

Vê gavê jî dewleta nijadperest ya Tirk dixwaze van çekdaran rêbike ser çeperên şerê Efrînê. Ev plane bi rastî jî bêbextane ye, zalimane ye. Dewleta Tirk gelek aşkera dixwaze van çekdaran rêbike Efrînê û Kurda bi Kurda bide kuştin ku eve ji du alîyan ve telifandina Kurdan e. Eve beramberî Kurda kîn û nefreta kûr ya dewleta Tirk nîşan dide. Çekdarên Kurd divêt vê niyeta neyarane ya dewleta Tirk baş bizanin û xwe nekine makîneya kuştinê ya vê dewleta dijî mirovî.

KNK hêvî dike ku çekdarên Kurd neçine Efrînê û xwe nekine darûdesteyê dewleta Tirk û xwûna hevwelatîyên xwe nerêjin. Heke hejmareke biçûk ya van çekdaran rêya xwe şaş bikin û sîleha xwe dirêjî xelkê xwe bikin û xwûna xelkê xwe birêjin eve dê bibe sûcekî gelek giran beramberî miletê xwe.

Divêt bi aşkerayî bête zanîn ku dewleta Tirk bi vê êrişa xwe ya li ser Efrînê esasen beramberî hemû Kurdan şerî dike. Lewma ev şerê dewleta Tirk yê li ser Efrînê dike şerekî neheq e. Beramberî vê neheqîya mezin divêt hemû Kurd pozisyoneke hevgirtî û xurt nîşan bidin.

Şerê Efrînê du rêya dide ber Kurda; rêya rûreşîyê û rêya rûspîtîyê.

KNK bawer dike ku Kurd dê rêya rûspîtîyê bidine ber xwe. Şerê Efrînê ji vî alî ve kaxeza turnusolê ye. Yên ku dijî êrişkarîya dewleta Tirk dê bi xurtî rawestin û di rêza miletê xwe da cih bigirin dê rûyê xwe spî bikin. Lê yên ku di vî şerî da xwe bêdeng bihêlin û reftareke layiqî miletê xwe û doza mezin ya Kurdistanê nîşan nedin dê rûyê xwe reş bikin.

Efrîn terazîya welatparêzîyê ye. Çeperê Efrînê parastina hemû Kurdistanê ye. Welatparêzî di şerê Efrînê da rengê xwe yê eslî nîşan dide.

Kurdên ku çekdarîya dewleta Tirk dikin, Kurdên ku di nav partîyên rejimê da cih digirin divêt di vî şerê Efrînê da li xwe vegerin û bêne nav refên miletê xwe.

Di vî şerê Efrînê da dewleta Tirk ya êrişkar divêt bête şkandin.

Di vî şerê man û nemanê yê Efrînê da Kurd û hevalbendên xwe divêt serbikevin.

KNK bangî hemû Kurdan dike ku xîreta xwe neşkênin, bêdeng nemînin û her bi çi rengî be dijî vê êrişkarî û dagîrkerîya dewleta Tirk sekineke neteweyî nîşan bidin.

Konseya Rêvebir ya KNKê

14 Sibat 2018, Bruksel

Not:

Ev nivîs bo KNKê hatîye nivîsîn.-RH

3ê Sibatê dengê xwe tevî dengê Efrînê bikin! Êrişkarî û dagîrkerîya dewleta Tirk protesto bikin! Efrîn dê azadîyê biafirîne!

3ê Sibatê dengê xwe tevî dengê Efrînê bikin!

Êrişkarî û dagîrkerîya dewleta Tirk protesto bikin!

Efrîn dê azadîyê biafirîne!

Dewleta Tirk ji 20ê vê mehê were bombeyan dibarîne ser Efrînê. Ji cihên gund û gundewar heta bajêr û bajêrwaran  bêyî tixûb dide ber bombeyan. Bêyî ferq û cudahî timamî jîngeh li ber êrişa vê dewleta har û hêc e. Berê jî dihate zanîn ku dewleta Tirk beramberî miletê Kurd bêwijdan û bêinsaf e, lê belê di vê êrişa li ser Efrînê da ev rûyê wan yê hov, ev zihnîyeta wan ya bi kîn û nefret hêj zelaltir xuya bû. Divêt êdî her Kurd baş bizane ku dewleta Tirk sûnd xwarîye ku Kurd nebine xwudan statu, nebine xwudan maf hetta nebine xwudan jîyan.

Koalisyonerê hukûmeta Erdogan û berdevkê cepheyê nijadperest û tifaqa Ergenekon, MHP û AKPê Dewlet Bahçelî bi devê xwe yê tijî jahr fermanan dibarîne û dibêje "bombe bikin, bila ber li ser berî û ser li ser leşî neminin"!. Eve fermana qirkirinê ye, eve banga cîhad û fetha dewleta Tirk e beramberî Kurd û Kurdistanê. Ji pratîka van çend rojên şerî xuya ye ku armanca vê sefera xwûnavî ya dewleta Tirk ya li ser Efrînê birandina Kurdan e. Şeran jî huqûqekî xwe heye. Qet nebe xelkê sivîl, xweza, xestexane, mabedên dînî nayêne bombe kirin. Lê dewleta Tirk van norman li ber çavan nagire, ji xwe guhê xwe nadê û bilaistisna her derê bombe dike, bi sîlehên otomatîk, bi tank û topan komkujîyê li ser xelkê sivîl dike. Blançoya şerê van çend roja aşkera kir ku niyeta dewleta Tirk kuşt û kuştdarî ye, qetlîam e.

Digel vê êrişa hinde giran jî dewleta Tirk rastî berxwedaneke xurt hatîye. Xelkê Efrînê pêkve di pêşengîya YPG-YPJê da û bi desteka hevalbendên xwe beramberî vê pêla giran ya êrişên dewleta Tirk berxwedaneke mezin û bilind nîşan didin. Dewleta Tirk bi vê makîneya xwe ya mezin ya şerî dîsa ve nikare li goreyî daxwaza xwe pêş bikeve. Anku berxwedaneke xurt, parastineke mezin ya welatî tête dîtin li terefê xelkê Efrînê. Xelkê Efrînê vê îradeya bilind ji welatperwerîya xwe ya bihabilind û piştevanîya hemû Kurd û Kurdistanîyan werdigire. Dilê hemû Kurdan nihe digel xelkê Efrînê ye.

Rastîyek heye ku divêt Kurd û Kurdistanî paşçav nekin. Niyeta dewleta Tirk ji hemû demên dîrokê xirabtir e, dijminanetir e, xayînanetir e. Lewma divêt ev êrîşkarî sivik û sist neyê girtin. Bi hemû hêz û şiyana navxweyî ya li seranserê Kurdistanê û heta meydanên dîasporayê divêt gelek bi organîze berxwedan bête nîşandan. Kurd divêt hemû dost û hevalbendên xwe gazî piştevanîyê bikin. Di nav vî agirî da Kurd divêt çembera hedefê mezin nekin û hejmara dijminan zêde nekin. Vê gavê, îro, di nav vî agirê Efrînê da divêt hedef li ser dewleta Tirk bête biçûk kirin û hemû dîqqet li ser vê dewleta xwûnxwar bête kom kirin. Kurd û Kurdistanî divêt berê tîrên xwe bidene ser Tirkîyeyê.

Kurd û Kurdistanî divêt beramberî dewleta Tirk şerê man û nemanê bikin. Armanca dewleta Tirk bi Efrînê ve teng nîne û divêt rê li ber wan bête girtin.

Roleke mezin dikeve ser milên dost û hevalbendên Kurdan jî. Kurd û Kurdistanî divêt bi xurtî bangî wan bikin ku di vê roja tengavîyê da bi xurtî û aktîvî bêne hawara miletê Kurd û Kurdistanê.

KNK bi giringî dixwaze gazîya xelkê Kurdistanê bi dinyayê ra, bi dost û hevalbendan ra rabigihîne ku heke dê bo Kurdistanê tiştekî xêrê bikin divêt îro bikin û bêne hawar û gazîya Efrînê û dewleta Tirk şermizar bikin.

KNK bangeke jîyanî dike ku dengê berxwedêra mezin ya Efrînê Avesta Xaburê bêyî deng nehêlin. Dengekê bidin. Dengekê bidin ku di serê dewleta Tirk da deng vede.

Efrîn berxwedaneke destanî dide. Efrîn afirînêr e. Efrîn bi vê berxwedêrîyê ve dê azadîyê biafirîne. Xelkê Kurdistanê bawerî bi vê reftara pîroz ya Efrînîyan heye. Lê erkên neteweyî û niştimanî erkên hevpar in. Lewma divêt çeperê parastinê di dora Efrînê da neyê hêlan. Her der divêt Efrîn be û ev êrişkarîya dewleta Tirk divêt bi kir û kiryarî bête rûreş kirin.

Efrîn bakura Kurdistanê ye, Efrîn rojhilata Kurdistanê ye, Efrîn başûra Kurdistanê ye, Efrîn rojavaya Kurdistanê ye, Efrîn dîasporaya Kurdistanî ye. Bi vê bîr û bawerîyê hemû Kurd, Kurdistanî di 3ê Sibatê da li her derê lê dengekê bidin, dengê dost û hevalbendan tevî dengê xwe bikin, ji bo Efrînê, ji bo parastina Efrînê û Efrînîyan, ji bo doza mezin ya Kurd û Kurdistanê dengekî gur bidin û bi vî dengê bilind erîşkarî û dagîrkerîya dewleta Tirk protesto bikin.

Konseya Rêvebir ya KNKê

31 Kanûna Paşîn [January] 2018, Bruksel

Not:

Ev nivîs bo KNKê hatîye nivîsîn-RH